day 01

వినయ్‌ది ఒక మధ్యతరగతి కుటుంబం.

పెద్దగా ఆస్తులు లేవు. జీవితంలో విలాసాలు లేవు. కానీ కొడుకు చదువుకుని మంచి స్థాయికి ఎదగాలనే ఒకే ఒక్క ఆశ మాత్రం అతని తల్లిదండ్రులకు ఉంది.

ముఖ్యంగా వినయ్‌ తండ్రి.

తన కొడుకు చదువుకోసం ఆయన ఎంతో కష్టపడుతుంటాడు. తన అవసరాలను పక్కన పెట్టి, ఇంటి ఖర్చులను చూసుకుంటూ, వినయ్‌ చదువుకు కావాల్సిన ఫీజులు కడుతూ ఉంటాడు. "నా కొడుకు బాగా చదువుకుని జీవితంలో పైకి రావాలి" అనేది ఆయన మనసులో ఉన్న ఒకే ఒక్క కోరిక.

ఆ రోజు వినయ్‌కు పరీక్ష.

తెల్లవారితే ఎగ్జామ్ పెట్టుకుని ఉంది. ముందు రోజు రాత్రి అయినా పుస్తకం పట్టుకుని చదవాల్సింది పోయి, "రేపు చూసుకుందాంలే..." అనే ధైర్యంతో తన గదిలో పడుకున్నాడు.

అలా పుస్తకాలు పక్కనే ఉండగానే నిద్రలోకి జారిపోయాడు.

ఉదయం...

"వినయ్... వినయ్... లేవరా!"

అతని తల్లి ఎన్నిసార్లు పిలిచినా వినయ్‌కి మెలకువ రాలేదు.

చివరికి అతన్ని కుదిపి లేపుతూ,

"లే రా! ఇంకో గంటలో నీకు ఎగ్జామ్ ఉంది!" అంది.

వినయ్ ఒక్కసారిగా కళ్లు తెరిచాడు.

"అయ్యో!"

అప్పుడే గుర్తొచ్చింది పరీక్ష విషయం.

హడావుడిగా మంచం మీద నుంచి లేచి, కొన్ని నిమిషాల్లోనే రెడీ అయిపోయాడు. పుస్తకాలు తెరిచి చూసే సమయం కూడా లేదు. బ్యాగ్ తీసుకుని, ఏదో తిన్నాననిపించుకుని ఇంటి నుంచి బయటకు పరుగెత్తాడు.

అదృష్టవశాత్తూ బస్సు కూడా అప్పుడే వచ్చింది.

వినయ్ బస్సెక్కాడు.

బస్సులో కూర్చుని పరీక్ష గురించే ఆలోచిస్తూ వెళ్తున్నాడు.

"ఏం రాస్తానో ఏంటో..."

"రాత్రి కొంచెం చదివుంటే బాగుండేది..."

అని తనలో తాను అనుకుంటూ చివరికి ఎగ్జామ్ సెంటర్ దగ్గర దిగాడు.

అక్కడ...

అతని చూపు ఒక్కసారిగా ఆగిపోయింది.

కొంచెం దూరంలో ఓ అమ్మాయి నిలబడి ఉంది.

సాధారణమైన దుస్తులు.

సహజమైన ముఖం.

ఏ మాత్రం హడావుడి లేదు.

కానీ వినయ్‌కి మాత్రం ఆ క్షణంలో చుట్టూ ఉన్న ప్రపంచమంతా ఆగిపోయినట్టనిపించింది.

అతను ఆమెనే చూస్తూ నిలబడిపోయాడు.

అంతలో ఆ అమ్మాయి కూడా వినయ్ వైపు చూసింది.

ఒక్క క్షణం మాత్రమే.

ఆ తర్వాత ఏమీ జరగనట్టుగా చాలా సాధారణంగా ముఖం తిప్పుకుని అక్కడి నుంచి ముందుకు వెళ్లిపోయింది.

కానీ వినయ్ మాత్రం అక్కడే నిలబడి ఉండిపోయాడు.

అతని మనసులో ఒక్కటే ఆలోచన.

"ఇంత అందంగా ఉందేంటి?"

అప్పుడే పక్క నుంచి అతని స్నేహితుడు తేజ వచ్చాడు.

వినయ్ ఇంకా ఆ అమ్మాయి వైపే చూస్తున్నాడు.

తేజను చూసి వినయ్ మెల్లగా అన్నాడు—

"ఏం చూసిందిరా!"

అని కాసేపు ఆ అమ్మాయి వైపు చూస్తూ,

"భలే ఉంది..."

అన్నాడు.

తర్వాత ఆసక్తిగా,

"ఎవర్రా ఆ అమ్మాయి?"

అని అడిగాడు.

మళ్లీ ఆమె వైపు చూస్తూ నవ్వుతూ,

"ఆ అమ్మాయిని చూస్తుంటే... రాత్రి చదివిందంతా మర్చిపోయేలా ఉంది రా!"

అన్నాడు.

కానీ తేజ మాత్రం ఏమీ మాట్లాడలేదు.

అతని ముఖంలో ఒక్కసారిగా భయం కనిపించింది.

వినయ్‌కి అర్థం కాలేదు.

"ఏంట్రా అలా చూస్తున్నావ్?"

అని అడిగాడు.

తేజ మాత్రం వినయ్ వెనుక వైపు చూస్తూ ఉండిపోయాడు.

అప్పుడే...

వినయ్‌కి వెనుక నుంచి ఓ స్వరం వినిపించింది.

"ఏం చదివి చచ్చావురా! హాల్ టికెట్ కూడా మర్చిపోయావ్, నా కొడకా!"

వినయ్ ఒక్కసారిగా ఉలిక్కిపడ్డాడు.

ఆ గొంతు ఎవరిదో అతనికి బాగా తెలుసు.

నెమ్మదిగా వెనక్కి తిరిగాడు.

అక్కడ...

అతని తండ్రి నిలబడి ఉన్నాడు.

చేతిలో వినయ్ హాల్ టికెట్.

ముఖంలో కోపం.

వినయ్ మాత్రం చుట్టూ చూశాడు.

అక్కడ చాలామంది విద్యార్థులు ఉన్నారు.

అందరూ వాళ్ల వైపే చూస్తున్నారు.

వినయ్‌కి ఒక్కసారిగా సిగ్గేసింది.

"నాన్నా!"

అని నెమ్మదిగా అన్నాడు.

"అందరూ చూస్తున్నారు... వెళ్లిపో!"

అన్నాడు.

కానీ అతని తండ్రి ఆగలేదు.

"ఏం బాబు?"

అని కోపంగా అన్నాడు.

"వెళ్లకు వెళ్లకు... ఫీజులు కడుతున్నానుగా!"

"తిండి మీద, నిద్ర మీద పెట్టే శ్రద్ధ చదువు మీద పెట్టి ఉంటే... ఈపాటికి బాగుపడేవాడివి!"

అని అందరి ముందే గట్టిగా మందలించాడు.

వినయ్‌కి ఏం మాట్లాడాలో అర్థం కాలేదు.

ఒకవైపు ఎగ్జామ్ టెన్షన్...

మరోవైపు తండ్రి మందలింపు...

ఇంకోవైపు తనను ఇప్పటివరకు చూస్తున్న ఆ అమ్మాయి ఎక్కడుందో అన్న ఆలోచన...

ఏదీ పట్టించుకోకుండా తన తండ్రి చేతిలో నుంచి హాల్ టికెట్ తీసుకున్నాడు.

"సరే నాన్న..."

అని తలదించుకుని అక్కడి నుంచి ఎగ్జామ్ హాల్ వైపు వెళ్లిపోయాడు.

తేజ మాత్రం అక్కడే నిలబడి ఉన్నాడు.

కొన్ని క్షణాలు తన నవ్వును ఆపుకోవడానికి చాలా కష్టపడ్డాడు.

చివరికి అతని వల్ల కాలేదు.

"హహహహా!"

అంటూ ఒక్కసారిగా బయటకు నవ్వేశాడు.

వినయ్ వెనక్కి తిరిగి కోపంగా చూశాడు.

తేజ మాత్రం నవ్వు ఆపుకోలేక,

"అమ్మాయిని చూసి రాత్రి చదివిందంతా మర్చిపోయానన్నావ్ కదరా... ఇప్పుడు హాల్ టికెట్ కూడా మర్చిపోయావ్!"

అని మనసులో అనుకుంటూ ఇంకా నవ్వుతూనే ఉన్నాడు.

వినయ్ మాత్రం ఏమీ చేయలేక, చేతిలో హాల్ టికెట్ పట్టుకుని పరీక్ష హాల్‌లోకి నడిచాడు.

ఆ రోజు పరీక్ష ఎలా రాశాడో తెలియదు...

కానీ పరీక్ష మొదలయ్యేలోపే వినయ్ జీవితంలో మాత్రం రెండు విషయాలు జరిగిపోయాయి.

ఒకటి...

అతని చదువు గురించి అతని తండ్రి ఇచ్చిన గట్టి గుర్తుచేయింపు.

రెండోది...

ఎవరో తెలియని ఓ అమ్మాయిని చూసి మొదటిసారి అతని మనసులో కలిగిన ఓ విచిత్రమైన అనుభూతి.